I dashur Marin
Ti shpreson që unë të lundroj me ty përgjithmonë. Tingëllon bukur, por unë nuk jam kapiteni yt i përjetshëm. Zoti gjithmonë na i merr mentorët pak para se të jemi gati, për të na lënë të qëndrojmë në këmbët tona.
Ndoshta nuk je gati të shkosh vetëm, por duhet ta dish se një nga qëllimet e mia më të larta ka qenë të të jap një pikënisje më të fortë në jetë dhe horizontin e një jete që ia vlen të jetohet. Ashtu siç shkojmë gjithmonë më larg sepse qëndrojmë mbi supet e gjigantëve që jetuan para nesh, edhe ti do të marrësh pjesë në këtë jetë përmes arritjeve të mia. Miqtë e mi, dhurata ime më e madhe për ty, do të jenë gjithmonë aty për të të udhëhequr drejt Engjëllit tënd të Fatit.
- Edison — Joyboy-i që do të jetë miku yt më i mirë dhe do të të mësojë ta ruash shpirtin fëmijëror, pranimin dhe dashurinë.
- Ilir — Leonardo da Vinci-u yt, që do të të japë qartësi dhe përparësi për ta pushtuar këtë botë.
- Maxi — Gjenerali i urtë, shkëmbi yt në dallgë, që do të të mësojë si të durosh dhe të qëndrosh drejt kur jeta t’i jep mësimet e vështira.
- Valon — Kumbari yt, Vizionari që do të t’i zgjerojë vetëdijen dhe horizontet, për të të mësuar të fluturosh më lart nga sa e ke menduar ndonjëherë të mundur.
- Edon — Luftëtari i urtë dhe guximtar që do të të çojë drejt madhështisë dhe përvojave të çmendura.
- Erblin — Gjuajtja jote e sigurt, ai që do të jetë gjithmonë aty për ty, ndodhë çka të ndodhë.
Të gjithë njerëzit janë krijuar të barabartë, por kjo vlen vetëm në kontekstin e ligjit dhe të të drejtave. S’ka të bëjë fare me përparësitë ekonomike dhe kulturore. Pasuria jote më e madhe në këtë jetë nuk do të jenë kurrë pasuritë apo mundësitë para teje, por kalaja në mendjen tënde, të cilën do ta ndërtojmë bashkë dhe do ta mbushim me guxim.
Një nga frikat e mia më të mëdha është që arritjet e mia të përfundojnë në pasuri e jo në vetëdije. Ashtu siç ndodh në shumicën e rasteve, statusi i prindërve do të përcaktojë pikënisjen e fëmijëve, por kjo është njëkohësisht edhe barra më e madhe.
Kam lexuar dikur se shumica e burrave të mëdhenj kanë qenë baballarë për ibret, sepse duhej të ishin të mëdhenj dhe ta investonin gjithë energjinë e tyre për të pasur sukses në jetë, por jo në familjet e tyre. Nga ana tjetër, s’kam takuar kurrë në jetën time dikë që është rritur në pasuri dhe e ka kultivuar veten aq sa të ketë respektin tim të plotë. Ndoshta ekzistojnë, dhe e di që ekzistojnë, por deri tani vetëm i kam ëndërruar. Kombinimi i sigurisë me statusin zakonisht përfundon në karaktere gjysmë të zhvilluara, sepse ata e humbasin bukurinë e jetës duke mos u përballur kurrë me situata ku ose ia del, ose mbaron. Mentaliteti all-in duhet jetuar, që shpirti të zërë vend në kalanë tënde.
Detyra ime si babai yt është të të mbështes dhe të të inkurajoj që të nisesh në aventurën e madhe të jetës. Sfidat e jetës do të duhet t’i përballosh vetë, por kurrë i vetëm.
Në këtë botë nuk mund të trashëgosh as pasurinë, as varfërinë; e njëjta vlen për suksesin dhe dështimin. E vetmja e vërtetë është se do t’ia dalësh, përderisa punon aq fort sa duhet. Unë besoj se fati farkëtohet me veprime, jo me prejardhje.
Mundësitë në këtë jetë janë të pabarabarta, por rezultatet janë ato që kanë rëndësi. Ti duhet t’i maksimizosh rezultatet e mundësive të tua. Çdo fitore sjell mundësi të reja, po ashtu edhe çdo dështim. Historia është plot me burra të privilegjuar që dështuan në jetë dhe me njerëz të varfër që ia dolën. Nëse dështon, dështo duke rrezikuar; nëse fiton, fito duke rrezikuar dhe duke dalë nga zona jote e rehatisë.
Nga një brez te tjetri është një jetë e tërë. Lavdia dhe suksesi i familjes nuk mund ta garantojnë të ardhmen e fëmijëve dhe të nipërve të saj. Siç ndodh te shumë familje të suksesshme, statusi i tyre bën që brezi që vjen të mos e ndërtojë karakterin sa duhet. Përparësitë e hershme ndihmojnë, por nuk e garantojnë fitoren në fund. Fëmijët e pasur kanë pak mundësi t’i zhvillojnë shkathtësitë që u duhen për mbijetesë. E vetmja arsye pse ia dola, ose një nga arsyet kryesore, se këtë s’mund ta përmbledhësh në një fjali, është se nuk kisha zgjidhje tjetër në jetë veçse të jepja më shumë seç kërkohej për sukses.
Mënyra më e shpejtë për ta dëmtuar dikë është t’i japësh para. Paraja mund t’i bëjë njerëzit të korruptuar, të degjeneruar, arrogantë dhe t’ua shuajë burimin e lumturisë. Unë nuk mund të të varros me duart e mia ty, që të dua pa kushte, nën pasuri e përtaci. Prandaj kam krijuar dhe kam vendosur në rrugën tënde një sistem drejt pasurisë.
Njeriu vërtet i lumtur është ai që di ta shijojë krijimin e vet. Dua të të shoh të bëhesh një karakter i fortë, që mbështetet në forcat e veta, dhe ta shijosh këtë jetë të mrekullueshme që ke përpara, i lirë dhe i pavarur. Shpresoj të jem gjallë aq gjatë sa të të shoh duke u përballur me sfidat e madhështisë.
Marin, çdo hap i yti do të jetë brengë për mua. Por, më shumë sesa i brengosur, unë jam i sigurt për ty dhe besoj në karakterin tënd të shkëlqyer. Një karakter që vlen më shumë se çdo pasuri në këtë botë, që do të të ndihmojë të ndërtosh një të ardhme të mirë dhe do të të çojë drejt një jete të suksesshme e me kuptim.
Pikënisja do të ndikojë në rezultat, por nuk e përcakton atë. Jeta jote sapo ka filluar, por një betejë të pret përpara. E ndiej që ti dëshiron të dalësh fitues i kësaj lufte, por duhet ta dish se vullnetin për ta ndjekur fitoren e kanë të gjithë, ndërsa fitojnë vetëm ata që janë të vendosur dhe të gatshëm.
Me dashuri, Babi ❤ 6 gusht 2023